"Balemlenteem" berpot, bitonafe lume dem lo 1000 bu, dem baroya koyara is 36 sokta, pu konak franciavaf piskupusik dure zo levplekur. Bato xo wan zo vegedur ise loon odiaxafo. Kare piskurafa is golerafa gejopa kagitina icde sanegara va berpot seylon gu Yurani Andergan sutesik is piskusik, aludevon rotowatar.
Drumbon mo xo ke Yurani Andergan
Va "Balemlenteem" kosmal !
Gan Admin  
Bareaviel 09 Toleaksat 2010

Abdarafi besasiki Balemlenteem tir berpot ke Yurani Andergan, franciavaf, awitis bak 2010.

Berpot moe bar-san-tevoy luz zo kolnayar, moe bar-san-tevoya sokta duvunhuyuna gan sutesik, dum miv yoltas bar-san-tevoy balemlent, va min stas mal Polinesia kal Geeamerika, mal Kavkaza kal Siberia, mal domega ke Mediterranea bira kal aludevafa Afrika, mali minafe witasare kali abdiizvugal. Pokirafa nega, tanuskafa is ayevafa gu minafa tamava isu nasbalara, bloskasa va yone tce izviiskafe sane, va mane dem artukafa namira is zultafa koyara. Cugunaykafa lenopa ekastanafa bene Izva.

Koe Balemlenteem gradilik tariad, nelkon ayikya. Yoni konakviele folvafi vox jontikviele kevmadasi ise kotviele suvesi bali. Konak decemoy koredik is yono decitoyo xo is yona yunkesa ava. Balemlenteem dere tir marnaberpot is jonkafa moaykayana welima is yoni bazesiki ilnarini darpe bueem keon dimtadleni ton laumasa lulara gan obras belisik, is dem jontika sledaja. Aze grogara va yon bibebup fenkud, askisa bas bat ilamtaf berpot va tankotasikipi va konaki varafi bopi ke ayastuva...

 
 
Pu piskusik... Berpot Sutesik Uzerara
Gan Yurani Andergan  
Toleaviel 15 Toleaksat 2010

Pu piskusik weltik,

Ede mo bato vegeduno is ware odiaxafo xo artfil, kire til piskusik ise va vargi levplekusi va jinaf "Balemlenteem" berpot al kazawal.

Dum toz kosmal, in tir bitonaf grabom dineyes bas jin va lo suterafa tanda is konak jonkaf tolbeliraf is tuwadaraf aksat. Nume jinafa galpera tipir da in gan piskupusik zo sanegatar ise kaik ivamumu va intaf saneg kakeveter.

Grupeson da abduaskira va man berpot is megrupen sutesik va zolonafa is jontazukafa boara keverur, folí da bak minafe sare dem kotniafa witafa golera ektudaso xo va batyon goskun volcugaf mergil paker. Coba rinon wina anton tir remgudaks is mirdig ape zo gotoljepeter viele dotrakura wal piskusik is jin al zo trasitir. Ostik batdume va mek enaf divokseks ke berpot is meka dace basitalanhasa giva mo gort amuzé.

Vexe, koe jinafa swava arienta tir ringapafa, ise gilabdufison me vogitenon, tí odiakaf ise va rin kaliapon fobuivé. Grewá ise boreon.

 
Pantogonie abdumimaks Efaya Abdufireka Sanegakseem
Gan Yurani Andergan  
Toleaviel 09 Toleaksat 2010

Pantogonie abdumimaks tir bitonafa suterafa sopurapa va jadifa ayalenopa besasa va konaka decitda, mali banaf Abdiizvugal batvieli, mukotasa va suterotafa toltublira va yone ilsetikeyene ik griawiyise sane soe webepeyese va ayastuva vox anton iskeyese va yona vreparlena conhuta isu rupa. Manyone sane isu ayik va artukafa namira wetce arayastasiki anton digiyid.

Stuva koinketena ko bata lenopapa isu koredik isu negama isu berpot ben tan fem fenkuyun gan "Balemlenteem" berpot isu tuvel zo gogluyonatad. Berpot demon titir dum torestava is tankotas fem.

Loon belil...
 
Ta kosmara va tan luz
ke "Balemlenteem" berpot...